Komisioni për Veprimtaritë Prodhuese, Tregtinë dhe Mjedisin diskutoi sot projektligjin “Për ofruesin e shërbimeve të lundrimit ajror “Albcontrol””.

Gjatë diskutimit të projektligjit ishin të pranishëm zëvendësministrja e Infrastrukturës dhe Energjisë Enkelejda Muçaj dhe Kledia Ngjela, drejtoresha e përgjithshme e Drejtorisë Rregullatore dhe Përputhshmërisë në Infrastrukturë dhe Energji.

Muçaj tha se projektligji ka për qëllim përcaktimin e formës së organizimit, të rregullave të funksionimit dhe të administrimit të shërbimeve të “Albcontrol”, si një ent publik.

Kryetari i komisionit Arben Pëllumbi, bëri me dije se ky projektligj ka kaluar në të gjitha komisionet për dhënie mendimi dhe se nuk ka propozime për ndryshime.

Në cilësinë e komisionit përgjegjës, pas diskutimeve të ndryshme, anëtarët e komisionit e miratuan këtë projektligj nen për nen dhe në tërësi.

Referuar relacionit, objektivi kryesor i këtij projektligji është organizimi i “Albcontrol”-it në formën e një enti publik të pavarur, jobuxhetor, jofitimprurës, i cili vepron në interes publik dhe ofron shërbimet e lundrimit ajror në hapësirën ajrore të Republikës së Shqipërisë, sipas parashikimeve të konventave dhe marrëveshjeve ndërkombëtare në fushën e aviacionit civil, të ligjit “Kodi Ajror i Republikës së Shqipërisë”, si dhe të akteve nënligjore të miratuara në zbatim të tyre.

Projektligji parashikon që “Albcontrol” të gëzojë pavarësi drejtuese, administrative, teknike dhe financiare. (ATSH)