Kryeparlamentarja Lindita Nikolla uroi sot me rastin e Ditës së Verës.

“Dita e Verës, fillimi i stinës së gëzueshme plot diell, dritë e jetë, le të na ndriçojë e inspirojë për të dashur e për t’u gëzuar më shumë me familjet tona, të afërmit, miqtë, njerëzit që na rrethojnë”, tha Nikolla.

“T’i gëzohemi e t’i kushtohemi natyrës, me urimin e shpresën që lulëzimi i saj të përshkojë edhe jetët tona”, theksoi ajo.

“Paçim një stinë të bukur, plot jetë, shëndet e gëzime për të gjithë”, përfundoi urimin e saj kryetarja e Kuvendit, Lindita Nikolla.

E quajtur ndryshe si dita e largimit të dimrit, Dita e Verës festohet sot si një pjesë e traditës jo vetëm tek banorët e qytetit të Elbasanit, por edhe në qytete të tjera të vendit dhe veçanërisht në Tiranë.

Në këtë ditë të shënuar, Elbasani kthehet në qendër të festimeve me aktivitete të larmishme, nga ekskursionet në natyrë deri tek dreka e begatshme familjare, ku nuk mungojnë ballakumet.