“Udhët V”, 22 pedagogë të Fakultetit të Arteve të Bukura ekspozojnë në Galerinë FAB

Ky është edicioni i 5-të i kësaj ekspozite (11-20 dhjetor 2023), të kthyer tashmë në një traditë të çdo fundviti.

Nga Dash Frashëri

“Udhët V”.

22 pedagogë të Fakultetit të Arteve të Bukura pranë Universitetit të Arteve, sjellin një ndër ekspozitat më të veçanta në Galerinë FAB (11-20 dhjetor), të kthyer tashmë në një traditë të çdo fundviti. Ky është edicioni i 5-të i këtij formati.

Mediume të ndryshme arti bëjnë bashkë përmes tablove klasike, veprave të artit bashkëkohor, skulpturave, fotografive, dhe mjaft veprave artistike, të një pjesë të pedagogëve e këtij universiteti, pasi një e dytë është parashikuar të hapet në janar 2024.

Artistët pjesëmarrës në këtë ekspozitë janë: Artan Buca, Artan Peqini, Ardian Kapo, Ardian Pepa, Anisa Paturi, Blerina Pagaria, Dea Tili, Dritan Nasi, Ergys Krisiko, Ermal Baboçi, Florian Haxhiyseni, Genc Përmeti, Gentjan Tabaku, Genti Spirollari, Mariglen Buzali, Orestia Kapidani, Orlis Vathi, Parid Dule, Rosita Habazaj, Valbona Karaboja, Viktor Ferraj dhe Xhovana Preçetaj.

“Kemi një traditë përsa i përket Fakultetit, që kohë pas kohe, gjithmonë në fund të vitit të hapim një ekspozitë.

Ky është edicioni i 5-të. Qysh kur e shpallëm hapjen e ekspozitës, ishte e natyrshme pjesëmarja e pedagogëve, por jo kaq e madhe.

Për këtë arsye edhe ekspozita u nda në dy fragmente. Janë rreth 40 autorë, i gjithë stafi akademik, me ndonjë mungesë të vogël. Mendoj se ky është një moment shumë entuziast dhe shumë interesant.

Ekspozita është hapur edhe në sensin, që studentët, në një farë mënyre të shikojnë produktin e pedagogëve; pedagogët të kenë mundësi te shohin produktet e kolegëve.

Gjëja më e rëndësishme është që një pjesë e punëve janë të reja, një pjesë janë dhe të ekspozuara, por në këtë ekspozitë krijojnë një asambël interesant”, tha Dekani i Fakultetit të Arteve të Bukura, Prof. Artan Peqini.