Presidenti i Republikës, Bajram Begaj përcolli sot një mesazh ngushëllimi familjes dhe tifozëve të Raphael Dwamena, kapitenit të klubit Egnatia, i cili ndërroi jetë ditën e sotme, gjatë sfidës Egnatia-Partizani.

“Mësova me dhimbje lajmin për humbjen tragjike të kapitenit të klubit “Egnatia”, Raphael Dwamena. Në këtë moment të vështirë shpreh ngushëllimet e mia të sinqerta për familjen, klubin “Egnatia” dhe tifozët rrogozhinas”, u shpreh Begaj.

Presidenti vlerësoi edhe kontributin e klubeve të futbollit në Shqipëri për rritjen e cilësisë së këtij sporti në vendin tonë.

Futbollisti Raphael Dwamena ka humbur ndjenjat gjatë ndeshjes së javës së 13-të të “Abissnet Superiore”, Egnatia-Partizani.

Pavarësisht ndërhyrjes së menjëhershme të mjekëve specialistë dhe të gjitha përpjekjeve të mëpasshme për ta rikthyer në jetë, futbollisti për fat të keq ka ndërruar jetë.