Kryeministri Edi Rama propozoi sot gjatë punimeve të Samitit të Procesit të Berlinit në Tiranë, vendosjen e statusit të vëzhguesit për vendet që janë në tranzit nga çelja e negociatave, deri tek anëtarësimi i plotë.

Në fjalën e mbajtur në hapje të punimeve të Samitit të Procesit të Berlinit, që po zhvillon punimet sot në Tiranë, Rama tha se “duhet të eksplorojmë rrugë të reja për të ngushtuar hendeqet ekzistuese dhe për të siguruar një ekzistencë të harmonishme të Europës”.

“Ajo çfarë po them është e se në këtë peizazh që zhvillohet shpejt në kohët e sotme, në një botë ku vendimet gjeostrategjike dhe të përshpejtuara po shndërrohen gjithmonë e më tepër në avantazhe të autokracive që po përpiqen të mbledhin forca edhe për të ndryshuar mënyrën se si funksionon bota nga Lufta e Dytë Botërore, ne duhet të eksplorojmë rrugë të reja për të ngushtuar hendeqet ekzistuese dhe për të siguruar një ekzistencë të harmonishme të Europës”, tha Rama.

Kryeministri theksoi se duhet të merremi me këtë ndasi përpara se ta dëmtojmë Europën së brendshmi.

“Në fakt e kuptoj që ideja e 33, 35 apo 40 anëtarëve të BE-së është diçka mjaft sfiduese për t’u parashikuar në të ardhmen e afërt në këtë kohë mjaft të trazuar brenda perimetrave të ndryshme. Në vend të kësaj do të pyesja: A do të ishte më pragmatike që të riformësojmë rrugëtimin nga bisedimet e anëtarësimit deri në anëtarësim dhe të mos nxitojmë duke vendosur afate anëtarësimi, të cilat mund as mos të dakordësohen apo t’u përmbahen 27 anëtarëve, por edhe të kundërshtojnë parimet meritës së integrimit të plotë të secilit prej vendeve? A do të ishte më e drejtë që të trajtohej inercia e kësaj ndasie duke futur statusin e vëzhguesit të vendeve që janë në tranzit nga çelja e negociatave deri tek anëtarësimi i plotë?” – tha Rama.

Ky status i ndërmjetëm, sipas tij, “do të jepte disa privilegje, natyrisht pa të drejtë vote”.

“Mund t’u jepte përfitime domethënëse të gjitha palëve duke rritur edhe unitetin politik mes Europës demokratike, gjithashtu rritjen e qeverisjes demokratike në Ballkanin Perëndimor. Në qoftë se mund ta heqim këtë ide të një marrëdhënie të largët dhe të funksiononim si partnerë do të mund të kuptonim sfidat e përbashkëta dhe do të ndanim më mirë barrat e kohëve të padyshimta sfiduese që shtrihen para nesh. Ky është një fillim premtues drejt kësaj rruge që do të eksplorojë në mënyrë kurajoze e të guximshme këtë mbyllje të kësaj ndarjeje midis kontinentit”, tha Rama.

Marrë nga ATSH