Një intervistë pune nuk fillon kur bëhet pyetja e parë, por sapo hyni në derë sjellja juaj gjykohet.

Sipas William Vanderbloemen, CEO i firmës së kërkimit ekzekutiv Vanderbloemen Search Group, intervistuesit i kushtojnë vëmendje të veçantë një gjëje: në cilën orë paraqiteni në takim.

“Gjithmonë më habit se sa shumë njerëz vijnë edhe dy minuta me vonesë për një intervistë me një filxhan kafe të freskët në dorë”, thotë Vanderbloemen, i cili ka intervistuar mbi 30,000 kandidatë për punë.

Natyrisht, shumica e menaxherëve të punësimit janë empatikë ndaj urgjencave të minutës së fundit, vështirësive teknike dhe trafikut të rënduar, por Vanderbloemen thotë se paraqitja vonë në një intervistë pune pa njoftim paraprak është një “flamur i kuq”.

“Përpikëria është testi i parë nëse po e merrni seriozisht këtë punë dhe nëse mund t’i besoni përgjegjësitë e rolit,” shpjegon ai. “Kur vendosni një takim me dikë, ju jeni duke bërë një marrëveshje dhe kur zgjidhni ta prishni atë marrëveshje, kjo do t’i bëjë njerëzit të fillojnë të vënë në dyshim integritetin dhe besueshmërinë tuaj.”

Arritja shumë herët për një intervistë pune mund të jetë gjithashtu e rrezikshme. “Nëse jam në mes të një takimi tjetër, ose bëj një pushim midis telefonatave, nuk është e dobishme që dikush të më presë për 15-20 minuta përpara telefonatës sonë të planifikuar,” thotë Vanderbloemen.

Koha më e mirë për t’u paraqitur në një intervistë pune është pesë minuta para kohës së planifikuar të fillimit, thotë ai. Paraqitja në kohën e duhur – jo shumë herët dhe jo shumë vonë – mund të duket si një detaj i vogël në skemën e madhe të një interviste pune, por mund t’ju ndihmojë të bëni diferencën nga konkurrenca juaj.

“Intervistat e punës mund të jenë stresuese, por bëhet shumë më e lehtë kur shfaqeni të përgatitur”, thotë Vanderbloemen. “Të jesh i përpiktë është hapi i parë për të vërtetuar gatishmërinë tënde.”

tp