Në tre vitet e fundit Shqipëria ka njohur trefishim të investimeve amerikane.

Presidenti i Dhomës Amerikane të Tregtisë në Shqipëri, Enio Jaço deklaron se në vitin 2019 kishim rreth 80 milionë dollarë, ndërsa në vitin 2022 investimet amerikane në Tiranë arritën 220 milionë dollarë.

“E rëndësishme për ne është të analizojmë llojin e investimeve që po vijnë. Po shohim shumë investime të vogla dhe të mesme që po kontribuojnë. Kjo na bën shumë të lumtur sepse tregon se ka një interes vërtet për Shqipërinë”, tha ai gjatë punimeve të Këshillit Atlantik.

Të dhënat e Institutit të Statistikave (INSTAT) tregojnë së në 6-mujorin e parë të këtij viti, importet nga SHBA u rritën me 49 %, por eksportet shënuan rënie prej 57 %.

Në vlerë, importet arritën 8.8 miliardë lekë nga 5.9 miliardë lekë që ishin në 6-mujorin e parë të vitit 2022, ndërsa eksportet ranë në 2.2 miliardë lekë nga 5.2 miliardë lekë që ishin në të njëjtën periudhë të 2022.