Kryetarja e Kuvendit, Lindita Nikolla priti ambasadoren e Suedisë, Elsa Håstad, me rastin e përfundimit të misionit të saj në Shqipëri.

Kryetarja Nikolla e falenderoi ambasadoren Håstad për kontributin e saj në zgjerimin dhe intensifikimin e marrëdhënieve mes Shqipërisë dhe Suedisë si edhe të bashkëpunimit parlamentar mes Kuvendit dhe Riksdag, çka u konstatua edhe gjatë vizitës zyrtare të Kryetares së Kuvendit në Stokhlom dhe takimin me kryetarin e parlamentit Andreas Norlén dhe anëtarë të kabinetit qeveritar.

Shqipëria dhe Suedia kanë marrëdhënie dypalëshe të shkëlqyera dhe bashkëpunim të ngushtë në organizatat ndërkombëtare.

Shqipëria i është mirënjohëse Suedisë për mbështetjen për integrimin evropian dhe mbështet fuqimisht anëtarësimin e saj në NATO, si një kontribut për forcimin e paqes dhe të sigurisë.

Ambasadorja Elsa Håstad falenderoi Kryetaren Lindita Nikolla për bashkëpunimin e shkëlqyer me Kuvendin dhe nënvizoi se shërbeu në Shqipëri në një periudhë të rëndësishme, të çeljes së negociatave dhe kontributeve të rëndëdishme për paqen dhe sigurinë.