Në hollin e Universitetit të Arteve është zhvilluar një koncert me krijimtarinë e zgjedhur korale e vokale të kompozitorit Vasil Tole. Koncerti u organizua nga Akademia e Artit dhe Trashëgimisë-ODEA me mbështetjen e Ministrisë së Kulturës dhe në bashkëpunim me Fakultetin e Muzikës në Universitetin e Arteve.

Pianiste dhe koncertmaestre ishte Ardita Bufaj, ndërsa koncerti u dirigjua nga Bujar Alliu.

Prej vitesh orientimi drejt vlerave kombëtare të muzikës sonë popullore është bërë një nga parimet e shkollës kompozicionale shqiptare, falë krijuesve të shquar Martin Gjoka, imzot Fan S. Noli, Thoma Nasi, Prenk Jakova, Lorenc Antoni, Çesk Zadeja, Tish Daija, Tonin Harapi, Kozma Lara, Fahri Beqiri, Feim Ibrahimi, Thoma Gaqi etj.

Këtë orientim shfaqi dhe repertori i koncertit të djeshëm ku u prezantua për të parën herë albumi me krijime të reja korale, krahas disa romancave dhe dy pjesëve pianistike.

Kompozitori akademik Vasil Tole u shprehu mirënjohje interpretëve e pjesëmarrësve që kishin mbushur sallën me këtë rast. /ATSH