UEFA ka nderuar ish-kapitenin e Shqipërisë, Lorik Cana, duke e ftuar që të asistojë në shortin e fazës së grupeve të Conference League, i cili u hodh në orën 13:30 në Stamboll, në arenën ku pasditen e djeshme u përcaktua edhe shorti për Champions League dhe u shpallën më të mirët e vitit.

Së bashku me Canën ishte i pranishëm edhe turku Nihat Kahvexhi.

Finalja do të luhet më 25 maj të vitit të ardhshëm në Tiranë, teksa Lorik Cana është caktuar ambasador i finales.

Për sa i përket Conference League, është një kompeticion që zhvillohet për herë të pare, teksa është niveli i tretë europian për klube, pas Champions League dhe Europa League.

Ish-kapiteni i Kombëtares u prezantua si legjendë e Shqipërisë dhe ai ngjyrat kuqezi i pohoi si më të bukurat e karrierës…

“Kam luajtur në shumë klube të njohura, jam krenar për karrierën time. Kur je fëmijë ëndërron të luash në nivelet më të larta. Kam qenë pjesë e Marseille, Galatasaray, Lazio dhe ekipe të tjera. Por padyshim që krenaria më e madhe është arritja me Kombëtaren dhe rrugëtimi me të” – u shpreh Cana në fillim.

Ish-kapiteni i kuqezi foli edhe për stadiumin “Air Albania” ku do të zhvillohet finalja e parë e Conference League.

“Air Albania” është një stadium i mrekullueshëm, modern, i vendosur në qendër të kryeqytetit. Është padyshim një stadium atraktiv dhe një nga më modernët në Evropë. Kjo finale që do të organizohet në Tiranë është edhe një mesazh që vjen nga vendet e Ballkanit.

Do të kënaqeni shumë, Shqipëria është vend shumë i bukur”, – mbylli Lorik Cana, që më pas zgjodhi goglat e grupeve, ku marrin pjesë skuadra si Tottenham, Roma, Basel, PAOK, Union Berlin, etj.

Burimi: Tifozet.al