Shqipëria po bëhet gjithnjë e më shumë destinacioni i preferuar për dashamirësit e natyrës dhe aventurës.

Ministri i Mjedisit, Sofjan Jaupaj bëri të ditur sot se 5.9 milionë vizitorë vizituan zonat e mbrojtura gjatë vitit 2025, 6% më shumë në krahasim me 2024. Sipas tij, 75% e rritjes së numrit vjen nga shtimi i vizitorëve të huaj.

“Zonat e mbrojtura janë sot asete të vërteta ekoturistike dhe një burim krenarie, me një rritje të qëndrueshme të vizitorëve nga viti në vit, falë edhe punës së palodhur dhe pasionit të administratave të zonave të mbrojtura që në çdo stinë kujdesen për menaxhimin, mikpritjen e “mysafirëve” dhe ruajtjen e biodiversitetit”, theksoi Jaupaj .

Ministri Jaupaj u shpreh se “nga parqet kombëtare te peizazhet e mbrojtura, këto hapësira janë destinacione që sjellin zhvillim lokal, punësim dhe vëmendje ndërkombëtare”.

Zonat e Mbrojtura në Shqipëri vlerësohen si një mundësi efektive për zhvillimin e turizmit të qëndrueshëm. Prandaj dhe po punohet fort që këto zona të mbrojtura të promovohen për vlerat e jashtëzakonshme të biodiversitetit që ato mbartin, por edhe si destinacione të rëndësishme turistike në nivel kombëtar dhe më gjerë.

Zgjerimi i Zonave të Mbrojtura në Shqipëri synon të rrisë integritetin e këtyre zonave, për gjendjen e paprekur të tyre, krahasuar me zona të tjera të vendit.

Burimi ATSH