Qyteti i Durrësit është përfshirë nga reshje intensive shiu, të cilat kanë sjellë probleme të shumta në disa zona të territorit të bashkisë. Si pasojë e përmbytjeve, në pamundësi të lëvizjes së prindërve, fëmijëve dhe nxënësve, bashkia Durrës njofton se mësimi është pezulluar në disa çerdhe dhe kopshte.

Sipas bashkisë Durrës, mësimi është pezulluar në: Kopshtin “Sotir Noka”; Kopshtin “Met Hasa”; Çerdhja nr. 1; Konvikti “Beqir Çela”; Kopshti “Neim Babameto”; Kopshti “Durrësi i Ri”; Kopshti “Fidanishtja”.

Bashkia Durrës njofton se procesi mësimor është pezulluar në të gjitha shkollat.

Sipas njoftimit, në kodrën e Currilave janë evidentuar rrëshqitje dheu, ndërsa disa akse rrugore janë bërë të pakalueshme për shkak të reshjeve të dendura.

Sipas bashkisë Durrës, rrugët problematike janë: Rruga “Mujo Ulqinaku”; Rruga “Hysen Myshketa”; Rruga “Marta Buda”; Rruga “Jahja Ballhysa”; Rruga “Kristo Sotiri”; Rruga “Glaukia”; Rruga “Vaso Pasha”; Rruga “Jeta Re”; Rruga “Vllazërimi”; Rruga “Jezerca”; Rruga “Azem Hajdari”; Rruga “Mbreti Pirro”; Rruga “Enkelejve”.

Këto rrugë ndodhen në lagjet nr. 12, 13, 14, 17 dhe 18. Gjithashtu, ka bllokime të qarkullimit nga zona e Mauzoleumit të Dëshmorëve deri në zonën e Durrësit të Ri.

Situatë problematike paraqitet edhe në njësinë administrative Rrashbull, si edhe në Manzë, ku ura e fshatit Borç rrezikon shembjen për shkak të prurjeve të mëdha të ujit. Deri më tani janë evakuar 10 familje, me nga 3–4 anëtarë secila, të cilat janë sistemuar pranë Konvaleshencës.

Sipas parashikimeve meteorologjike, reshjet e dendura pritet të vijojnë deri në orët e drekës. Për këtë arsye, u bëhet thirrje qytetarëve të shmangin lëvizjet e panevojshme dhe të tregojnë kujdes maksimal.

Të gjitha ekipet e Bashkisë së Durrësit ndodhen në terren dhe po punojnë intensivisht për menaxhimin e situatës.

Burimi ATSH