Flota e mjeteve elektrike në vend po vijon të rritet me ritme të shpejta, duke dhënë shenja të qarta të orientimit gjithnjë e më të madh drejt transportit të qëndrueshëm dhe miqësor me mjedisin.

Sipas të dhënave të Drejtorisë së Përgjithshme të Shërbimeve të Transportit Rrugor (DPSHTRR), gjatë periudhës janar–nëntor 2025 janë regjistruar për herë të parë 5312 mjete All-Electric, shifër kjo që përfaqëson një rritje prej 82,6% krahasuar me të njëjtën periudhë të vitit 2024.

Nga 2019 deri në nëntor 2025, janë regjistruar 11 690 mjete All-Electric. 44,4% e autoveturave me km 0 të regjistruara për periudhën janar-nëntor 2025 janë All-Electric, ose 63% krahasuar me vitin 2024.

Ky trend pozitiv dëshmon rritjen e ndërgjegjësimit të qytetarëve dhe institucioneve për përfitimet që ofron përdorimi i mjeteve elektrike, si ulja e ndotjes së ajrit, reduktimi i emetimeve të karbonit dhe kostot më të ulëta të mirëmbajtjes.

Shtimi i mjeteve “green” në rrugët e vendit konsiderohet një hap i rëndësishëm drejt një sistemi transporti më të pastër, më efikas dhe më të qëndrueshëm, në përputhje me objektivat mjedisorë dhe politikat e zhvillimit të gjelbër.