Komisionerja për Zgjerimin e Bashkimit Europian, Marta Kos u shpreh gjatë fjalës së saj në nisje të punimeve të samitit për Planin e Rritjes në Tiranë, se një treg i përbashkët rajonal rrit ekonomitë e vendeve anëtare me 10%.

Në tryezën e samitit, ku të pranishëm janë Kryeministri Edi Rama dhe disa prej liderëve të Ballkanit Perëndimor, Kos tha se mungesa e progresit apo ecurisë rrezikon aksesin në tregun e vetëm të BE-së.

“Reformat për të cilat ne kemi rënë dakord nuk janë të lehta. Por, ato lejojnë përshpejtimin e negociatave në BE dhe përgatisin ekonomitë tuaja për tregun e përbashkët me 450 milionë banorë. Ato japin mundësi dhe qasje në një trajtim të ngjashëm si vendet anëtare me politikat e BE-së si dhe u tregojnë vendeve anëtare të BE-së se ju jeni gati për më shumë integrim të thelluar në BE”, tha ajo.

Kos tha se Presidentja e Komisionit Evropian, Ursula von der Leyen ishte shumë e impresionuar nga dy konferencat e investimeve, ndërsa shtoi se kjo punë e nisur duhet të shkojë përpara për të sjellë akoma më shumë investime të qëndrueshme nga BE dhe më shumë partnerë tregtarë në rajon.

“Ne e dimë që sa më shumë i afrohemi zgjerimit aq më shumë investohet dhe është thelbësore që të arrijmë në realitet konvergjencën tuaj ekonomike me vendet e BE-së. Ne e dimë nga përvoja që sa më shumë ecni përpara drejt BE-së, aq më shumë kureshtje kanë investuesit e huaj, mediat evropiane për vendet tuaja dhe shpresoj që sa më shumë kureshtje të vijë edhe nga vetë qytetarët e tyre”, vijoi Kos.

“Le t’i shfrytëzojmë dy vitet e mbetura për ta bërë Planin e Rritjes një sukses të vërtetë për të përgatitur terrenin e për të anëtarësuar vendin tuaj në BE sepse objeksioni i vërtetë i Planit të Rritjes është që t’ju ndihmojmë të ecni më tej që të bëheni anëtarë më të drejta të plota në BE në të ardhmen”, përfundoi Kos.

/Burimi ATSH