Kryetari i grupit parlamentar të Partisë Socialiste, Taulant Balla, ka reaguar pas mbledhjes së Sekretariatit për Procedurat, Votimet dhe Etikën, duke theksuar rëndësinë e sjelljes dhe gjuhës në jetën parlamentare.

Sekretariati për Procedurat, Votimet dhe Etikën shqyrtoi sot dhe rrëzoi kërkesën e shtatë deputetëve të opozitës për përjashtimin e Ballës për thyerje të etikës në seancën plenare të së enjtes së kaluar.

Duke iu referuar vendimit, Balla reagoi duke sjellë një thënie të urtë, e cila, sipas tij, e ka mësuar të kalisë durimin dhe sjelljen: “Kush di të ruajë gjuhën, di të ruajë nderin”.

“Etika parlamentare është themeli i besimit publik ndaj institucioneve demokratike. Ajo kërkon që çdo deputet të veprojë me ndershmëri, përgjegjësi dhe respekt ndaj Kushtetutës, rregullores dhe kolegëve”, shkroi Balla në rrjetet sociale.

Ai nënvizoi se asnjë deputet nuk duhet të vendoset mbi rregullat dhe normat e respektit parlamentar. “Debati parlamentar nuk duhet të jetë arenë fyerjesh, por hapësirë e dialogut dhe e argumentit”, vuri në dukje kreu i grupit parlamentar të PS-së.

“Respekti për fjalën, për të vërtetën dhe për qytetarët që përfaqësojmë është thelbi i një Kuvendi dinjitoz dhe europian. Përpjekja për të patur seanca dhe komisione parlamentare ku asnjë deputet nuk është mbi rregullat dhe normat e respektit reciprok, do t’i ndryshojë faqen Kuvendit dhe do të rrisë besimin e qytetarëve”, vijoi ai.

Sekretariati i Etikës e rrëzoi sot kërkesën e e shtatë deputetëve të Partisë Demokratike për ta përjashtuar atë nga punimet e Kuvendit me pretendimin se kishte përdorur “gjuhë fyese dhe kërcënuese” ndaj deputetëve të opozitës.

Por Sekretariati vendosi se nuk kishte bazë për përjashtim, pasi neni 65/1 i Rregullores së Kuvendit parashikon që një masë e tillë mund të merret vetëm pasi janë zbatuar më parë masa të tjera disiplinore nga kryetari i Kuvendit.

Burimi ATSH