Ministri i Financave, Petrit Malaj deklaroi sot se paralelisht me hartimin e projektbuxhetit 2026, është përgatitur edhe Paketa Fiskale, e cila përfshin disa ndryshime ligjore, por pa rritje apo vendosje të taksave të reja.

“Nuk do të kemi rritje taksash dhe nuk do të kemi taksa të reja”, theksoi Malaj, duke shtuar se ndryshimet synojnë jo vetëm rritjen e të ardhurave për buxhetin e shtetit, por edhe mbështetjen e biznesit, fermerëve dhe qytetarëve.

Ministri veçoi disa nga politikat më kryesore që parashikon Paketa Fiskale 2026.

“Skema e fermerëve, përmes kompensimit të TVSH-së në normën 10%, e cila do t’u lërë fermerëve në duar rreth 1,5 miliardë lekë në vit; Rivlerësimi i pasurive të paluajtshme, me një normë prej 5%, që do të zbatohet gjatë gjithë vitit 2026; Zbatimi i “Paqes fiskale”, një reformë që synon ndërtimin e një marrëdhënieje të re besimi mes biznesit dhe shtetit”, janë disa nga politikat ekonomike që renditi Malaj.

Sipas Malajt, këto masa synojnë të forcojnë stabilitetin ekonomik dhe të krijojnë kushte më të favorshme për zhvillimin e sektorit privat dhe bujqësisë në vend.

Burimi ATSH