Në kuadër të Mbledhjeve Vjetore 2025 të Fondit Monetar Ndërkombëtar dhe Bankës Botërore, Guvernatori i Bankës së Shqipërisë, Gent Sejko, zhvilloi një takim me Antonella Bassani, Zëvendëspresidente e Bankës Botërore për Rajonin e Evropës dhe Azisë Qendrore.

Gjatë takimit u diskutuan zhvillimet më të fundit ekonomike në Shqipëri, si dhe sfidat kryesore që përballon sistemi financiar. Të dy palët vlerësuan bashkëpunimin e vazhdueshëm dhe mbështetjen teknike që Banka Botërore ka ofruar përmes Qendrës për Ndihmë Teknike në Fushën Financiare (FINSAC).

Banka e Shqipërisë bën të ditur se, në fokus të diskutimeve ishin pritshmëritë për rritje të qëndrueshme ekonomike dhe kthimi i inflacionit në objektivin 3% gjatë gjysmës së parë të vitit 2026, ndërkohë që u theksua se rreziqet e brendshme dhe të jashtme mbeten të balancuara.

Guvernatori Sejko nënvizoi rëndësinë e mbështetjes teknike nga Banka Botërore në kuadër të: Projektit rajonal për implementimin e TIPS clone (sistem për pagesat e menjëhershme), dhe hartimit të Ligjit të ri për Bankat, i cili synon të harmonizohet me standardet e Bashkimit Evropian, në funksion të objektivit strategjik të Shqipërisë për integrimin evropian.

Takimi konfirmoi vullnetin për të thelluar bashkëpunimin mes Bankës së Shqipërisë dhe Bankës Botërore në funksion të modernizimit të mëtejshëm të sektorit financiar dhe forcimit të stabilitetit makroekonomik në vend.

Burimi ATSH