Mazhoranca socialiste do të propozojë ngritjen e dy komisioneve të posaçme parlamentare, për Reformën Zgjedhore dhe i Reformës Administrativo-Territoriale.

Lajmin e bëri të ditur kreu i grupit parlamentar të Partisë Socialiste, Taulant Balla i cili në një prononcim për mediet informoi se PS do ndjekë traditën si nismëtare për këto komisione në legjislaturë.

Balla uroi që Komisioni i Posaçëm për Reformën Zgjedhore i kësaj legjislature të udhëhiqet nga interesi i përbashkët i të gjithë aktorëve politikë të përfaqësuar në Kuvendin e Shqipërisë, për të përmbyllur më në fund të gjitha rekomandimet e raporteve të OSBE-ODIHR ndër vite, ku theksoi ai, “ndër rekomandimet bazë mbetet çështja e depolitizimit të komisioneve zgjedhore, duke risjellë në vëmendje edhe zgjedhjet e fundit ku formacione të caktuara politike kontestuan punën e komisionerëve të tyre apo numëruesve të tyre në grupet e numërimit. Për pasojë vunë në dyshim, le të themi, cilësinë e punës së këtyre komisioneve”.

“Partia Socialiste mbetet partia që ndër vite, e ka mbështetur çështjen e depolitizimit”, nënvizoi ai.

Ai theksoi se, ndër çështjet që duhet të adresojë Komisioni i Posaçëm i Reformës Zgjedhore me urgjencë, mbeten dhe çështjet e rritjes së transparencës së financimit të fushatave zgjedhore dhe çështjet e financimit të partive politike.

“Është në objektivin e këtij komisioni të posaçëm të adresojë gjithë punën e bërë ndër vite”, shtoi Balla.

Po ashtu, Balla u shpreh se, në Kodin Zgjedhor duhen adresuar edhe nenet përkatëse për mbajtjen e zgjedhjeve për Parlamentin Europian.

“Duhet të kemi nenet përkatëse të Kodit Zgjedhor të Republikës së Shqipërisë ose draftin gati sa i përket edhe mbajtjes së zgjedhjeve për Parlamentin Europian, sepse në fund të fundit, në pritshmëritë tona po afrohet momenti kur Shqipëria duhet të ketë dhe anëtarët e vet në Parlamentin Europian”, u shpreh balla.

Po ashtu, Balla theksoi se, nisma tjetër ka të bëjë me Komisionin e Posaçëm të Reformës Administrative dhe Territoriale.

Sipas tij, komisioni duhet të ketë paritetin e përfaqësimit mes mazhorancës dhe opozitës, sikurse ka qenë edhe në dy komisionet e tjera të posaçme të reformës zgjedhore dhe administrative.

Komisioni i parë i ngritur në vitin 2013 u konkretizua me ndryshime në ligj të miratuara në korrik të vitit 2014, ndërsa në legjislaturën e kaluar nuk u konkretizuan ndryshime në ligjin për ndarjen administrative-territoriale, por, sipas Ballës, kishte plot rekomandime të vlefshme.

Të gjitha këto, shtoi ai, “duhen parë tanimë në një kontekst më shumë se 10-vjeçar për t’i hapur rrugë, pse jo, reformave të reja sa i përket rolit dhe ndarjes administrative-territoriale”.

Balla vlerësoi se, këto komisione që janë komisione tepër të rëndësishme për punën e Kuvendit të Shqipërisë.
Ai uroi që edhe grupi parlamentar i Partisë Demokratike, grupi parlamentar i Aleancës për Ndryshim, grupi parlamentar i Partisë së Lirisë dhe deputetët e tjerë të pavarur, sipas projektvendimit që do miratojë Kuvendi, të plotësojnë vakancat në këto komisione.