Deputetët e Partisë Demokratike mbajtën sot në Kuvend një minutë heshtje në nderim të ish-diplomatit dhe deputetit Abdi Baleta.

Kërkesën e paraqiti në seancë deputeti i PD-së, Besart Xhaferri, me argumentin se nuk mund të pritet për zbatimin e procedurës pasi Abdi Baleta është ndarë nga jeta 6 ditë më parë.

Menjëherë pas kësaj deputetët e opozitës mbajtën një minutë heshtje në Kuvend.

Duke sqaruar procedurën, kreu i grupit parlamentar të Partisë Socialiste, Taulant Balla kujtoi se Kuvendi i Shqipërisë e ka standardizuar prej kohësh një procedurë të qartë mbi mënyrën se si kërkohet një minutë heshtjeje.

“E kemi bërë me konsensus këtë ndërhyrje, sepse një nderim i tillë duhet bërë siç duhet. Kërkesa depozitohet me shkrim nga në fillim të seancës dhe përcaktohet ora e saktë e mbajtjes së saj,” u shpreh Balla.

Ai kritikoi mënyrën se si ishte vepruar në një seancë të mëparshme, duke e cilësuar “një formë qesharake” të kërkesës së mbajtjes së minutës së heshtjes.

“Sa e keni respektuar ju Abdi Baletën, e di familja e tij dhe e dinë të gjithë shqiptarët,” tha kreu i grupit socialist.

Balla bëri të qartë se PS mbështet kërkesën për një minutë heshtje për ish-deputetin e ndjerë Abdi Baleta dhe tha se pas përfundimit të diskutimeve për rendin e ditës, minuta e heshtjes duhet të mbahet me respektin dhe solemnitetin e duhur.

Ish-diplomati dhe deputeti Abdi Baleta u nda nga jeta në 19 shtator, në moshën 84-vjeçare.

Abdi Baleta ka qenë ambasador i Shqipërisë në Organizatën e Kombeve të Bashkuara, si dhe një nga themeluesit e Partisë Demokratike.

Burimi ATSH