Në të gjitha universitet e vendit janë plotësuar rreth 16 mijë kuota nga studentët, që do të nisin për herë të parë arsimin e lartë.

Drejtori i Përgjithshëm i RASH – Rrjetit Akademik Shqiptar, Arjan Xhelaj tha sot për Agjencinë Telegrafike Shqiptare, se “në raundin e parë janë plotësuar rreth 16 mijë kuota në universitet në të gjithë vendin. Degët që lidhen me shkencat mjekësore, IT dhe inxhinieritë janë plotësuar plotësisht dhe arrijnë së bashku mbi 50% të totalit të regjistrimeve të deritanishme ”.

Sipas tij, raundi i parë i parë i regjistrimeve kishte një ecuri të mirë.

“Nga mbi 20 mijë maturantë që aplikuan, u regjistruan afërsisht 80% e tyre. Kishte programe që u plotësuan menjëherë, sidomos ato me konkurs, si Mjekesia e Përgjithshme, Arkitektura dhe Urbanistika, por edhe degët e Akademisë së Sigurisë dhe asaj të Forcave të Armatosura”, nënvizoi Xhelaj.

Për këtë vit akademik edhe degët e mësuesisë kanë një ecuri të mirë.

“Në degët që lidhen me mësuesinë ka një vazhdimësi si vitin e kaluar me rreth 7,5% të totalit të studentëve të regjistruar”, tha Xhelaj.

Kreu i RASH u shpreh se raundi i dytë është një fazë ku maturantët duhet të jenë më realistë dhe të zgjedhin degë në përputhje me rezultatet që kanë.

Mundësinë për të aplikuar nga data 20-22 shtator në portalin UAlbania do ta kenë rreth 7 mijë maturantë duke përfshirë këtu edhe të ardhurit nga sezoni i vjeshtës.

Raundi i dytë i regjistrimeve në universitete nis më 29 shtator dhe do të zgjasë deri më 8 tetor, në 5 faza 48 orëshe.

Burimi ATSH