Shqipëria do të pasurohet me një rrjet të ri ballkonesh panoramike në zonat e mbrojtura, përmes një projekti të ndërmarrë nga Agjencia Kombëtare e Zonave të Mbrojtura (AKZM), i cili synon të ofrojë për vizitorët eksperienca turistike më të plota, ndërgjegjësuese dhe edukative në natyrë.

AKZM bën të ditur se, projekti i titulluar “Ballkone panoramike në rrjetin e zonave të mbrojtura: studim, përmirësim, mirëmbajtje”, do të shtrihet në 12 qarqet e vendit dhe do të realizohet në pika strategjike me vlera të larta natyrore dhe peizazhore, si: Kapinovë (Berat); Lugina e Lurës (Dibër); Divjakë–Karavasta (Fier); mali i Kallabakut (Kukës)
dhe disa të tjerë.

Në vijim të projektit është zhvilluar edhe takimi i parë teknik me ekspertët për hartimin e projekteve, çka shënon nisjen zyrtare të punës për realizimin e këtij vizioni natyror dhe turistik.

Ballkonet panoramike do të jenë struktura të lehta, të ndërtuara me materiale ekologjike dhe me ndikim minimal në mjedis.

Ato do të përdoren jo vetëm për vëzhgim të natyrës, por edhe për informim, edukim dhe ndërgjegjësim të vizitorëve mbi rëndësinë e mbrojtjes së biodiversitetit dhe trashëgimisë natyrore.

Kjo nismë është pjesë e një strategjie më të gjerë për të zhvilluar infrastrukturën turistike në zonat e mbrojtura, duke nxitur diversifikimin e ofertës turistike të Shqipërisë, përtej destinacioneve tradicionale bregdetare.

Burimi ATSH