Kalatë, muzetë, parqet arkeologjike, qendrat historike, kulturore dhe objektet e kultit në të gjithë vendin, janë kthyer në pika atraksioni për turistët e huaj dhe vendas.

Kryeministri Edi Rama, ndau sot në rrjetet sociale një galeri fotosh nga disa prej atraksioneve më të bukura të vendit, ku grupe të mëdha turistësh njihen nga afër me këto site kulturore ku pasqyrohet historia shqiptare ndër shekuj.

Rama shprehet se “nga Kalaja e Gjirokastrës, te Kruja, e deri tek kishat dhe manastiret më të vjetra të vendit, të gjitha destinacionet historike të Shqipërisë janë sot të mbushura me turistë”.

Mbi 1 milion vizitorë kanë hyrë gjatë këtij viti në kalatë, muzetë dhe parqet arkeologjike të vendit. Krahasuar me vitin 2023, numri i vizitorëve është rritur me 58%, ndërsa të ardhurat janë shtuar me 84%.

Për të gjitha vlerat që mbartin, si dhe si pjesë e atraksioneve historike e kulturore të Shqipërisë, kalatë, muzetë dhe objektet e kultit po tërheqin vëmendjen e turistëve nga e gjithë bota, duke u kthyer në destinacione turistike gjithëvjetore.

Burimi ATSH