Investimet në infrastrukturën arsimore mbeten prioritet i qeverisë për të garantuar kushte më të mira për nxënësit dhe mësuesit.

I tillë ishte edhe investimi i përbashkët i Ministrisë së Arsimit dhe Sportit dhe bashkisë Elbasan, në shkollën “Fadil Gurmani” në Elbasan, që këtë viti të ri shkollor mirëpriti nxënësit dhe mësuesit me kushte dinjitoze.

Kryeministri Edi Rama ndau sot në rrjetet sociale fotografi nga shkolla “Fadil Gurmani” në Elbasan, ku mbi 350 nxënës dhe mësues kanë nisur mësimin në klasa dhe ambiente moderne, pas një transformimi tërësor që e ka kthyer shkollën në një hapësirë të denjë për mësim.

Shkolla “Fadil Gurmani” do të bëhet pjesë e nismës “Shkollë Qendër Komunitare”, ku ambientet do të shfrytëzohen jo vetëm gjatë orëve mësimore, por edhe pasditeve, së bashku me prindërit dhe familjarët.

Në total, në bankat e shkollave të Bashkisë Elbasan këtë vit janë ulur rreth 15 mijë nxënës, prej të cilëve 1,200 fëmijë nisën klasën e parë.

Në territorin e bashkisë Elbasan funksionojnë gjithsej 130 institucione arsimore publike, mes të cilave çerdhe, kopshte, shkolla 9-vjeçare dhe shkolla të mesme.

Burimi ATSH