Ministri i Ekonomisë, Kulturës dhe Inovacionit, Blendi Gonxhja, reagoi sot lidhur me situatën alarmante të zjarreve që kanë përfshirë disa zona të vendit ditët e fundit, duke theksuar përkushtimin maksimal të institucioneve për të mbrojtur trashëgiminë kulturore kombëtare nga rreziku i flakëve.

Gonxhja bëri me dije se MEKI në bashkëpunim me Institutin Kombëtar të Trashëgimisë Kulturore dhe drejtoritë rajonale po ndjek në mënyrë të vazhdueshme zhvillimet në terren dhe ka marrë masa konkrete për të parandaluar dëmtimet në monumentet historike dhe kulturore.

Sipas tij, në qarqet Dibër dhe Shkodër, pavarësisht përhapjes së zjarreve në disa vatra, nuk janë raportuar dëmtime në objekte të trashëgimisë kulturore.

“Ndërhyrja e shpejtë e strukturave të zjarrfikësve dhe e ushtrisë ka bërë të mundur që monumente si Muzeu i Kastriotëve dhe Kështjella e Fletit të mbeten të paprekura dhe jashtë rrezikut”, tha ai.

Ndërsa në qarkun e Vlorës, ministry informoi se zjarret kanë prekur zonën pranë Manastirit të Shën Mërisë së Krimanovës në fshatin Piqeras, ku është dëmtuar vetëm bimësia në oborrin e pasëm të objektit, pa u cenuar struktura arkitektonike e Manastirit.

Ai vuri në dukje se situata më problematike është regjistruar në qarkun Gjirokastër, ku Kisha e Shën Ilias në fshatin Lekël, një monument kulture i kategorisë së dytë, ka pësuar dëmtime si pasojë e përhapjes së flakëve. Megjithatë, falë reagimit të menjëhershëm, pjesa më e madhe e kishës është shpëtuar dhe tashmë është në proces hartimi një projekt ndërhyrjeje për restaurim dhe rikuperim të dëmeve.

Ministri Gonxhja theksoi se të gjitha Drejtoritë Rajonale të Trashëgimisë Kulturore kanë qenë në gatishmëri të plotë dhe kanë ndërmarrë masa parandaluese për të mbrojtur monumentet.
“Ato kanë krijuar breza sigurie përreth objekteve, kanë larguar vegjetacionin e thatë, kanë ngritur grupe kontakti me strukturat e zjarrfikësve dhe kanë bashkëpunuar ngushtë me autoritetet lokale, duke pajisur stafin me mjetet dhe materialet e nevojshme për përballimin e situatës në terren”, tha ai.

Gonxhja bëri thirrje për vigjilencë dhe përgjegjësi nga ana e qytetarëve, të shmangin ndezjen e zjarreve në natyrë apo gjatë pastrimit të parcelave dhe të raportojnë menjëherë çdo sinjal tymi apo flake që mund të vënë re.

Burimi ATSH