Sekretari i Përgjithshëm i Prefekturës së Kukësit, Donald Korbi, mblodhi sot grupin e punës për monitorimin dhe menaxhimin e emergjencave civile, me qëllim diskutimin mbi koordinimin e forcave dhe kapaciteteve të nevojshme për të përballuar situatat e krijuara nga zjarret.

Në takim morën pjesë përfaqësues të institucioneve shtetërore dhe lokale, si dhe specialistë të emergjencave civile nga bashkitë Kukës, Has dhe Tropojë. Të pranishmit analizuan problemet dhe sfidat e shkaktuara nga zjarret në këtë rajon dhe ofruan rekomandime për përmirësimin e menaxhimit të situatave të emergjencave, duke kërkuar angazhimin e plotë të të gjithë faktorëve të interesuar.

I pranishëm në takim ishte edhe Këshilltari i Ministrit të Brendshëm, Flamur Mamaj, i cili theksoi rëndësinë e bashkëpunimit të ngushtë ndërmjet institucioneve dhe forcave të rendit dhe emergjencave, për të garantuar një reagim të shpejtë dhe efikas ndaj situatave të rrezikshme.

Gjithashtu, drejtori i përgjithshëm i MZSH-së, Arben Cara, rikujtoi prioritetet e qeverisë shqiptare për këtë sezon dhe nënvizoi angazhimin maksimal të institucioneve për mbështetje në terren.

Burimi ATSH