Gjatë tremujorit të dytë të vitit, Autoriteti Kombëtar për Sigurinë Kibernetike ka menaxhuar me sukses 29 incidente kibernetike, që përfshijnë një spektër të gjerë kërcënimesh ndaj institucioneve në vend.

Sipas AKSK-së, sulmet më të shpeshta kanë qenë të tipit DDoS, me qëllim ndërprerjen e shërbimeve publike, ndërsa incidenti me impaktin më të rëndë ka qenë sulmi WIPER ndaj Bashkisë së Tiranës, i cili synonte fshirjen përfundimtare të të dhënave dhe dëmtimin e funksioneve digjitale.

Krahas tyre, janë identifikuar edhe tentativa phishing, spear phishing, skanime të paautorizuara të rrjeteve, komprometime aplikacionesh, trojanë dhe shfrytëzim i dobësive në sisteme të ndryshme.

“Ky tremujor konfirmon qartë nevojën për vigjilencë të vazhdueshme dhe përforcimin e kapaciteteve reaguese. AKSK, në rolin e saj si institucion qendror për sigurinë kibernetike, vijon të garantojë monitorim të pandërprerë, ndërhyrje në kohë reale dhe mbështetje teknike për infrastrukturat kritike dhe të rëndësishme të informacionit në vend”, thuhet në njoftimin e AKSK-së.

Burimi ATSH