Autoriteti Kombëtar për Sigurinë Kibernetike u ka bërë thirrje sot qytetarëve që të tregojnë kujdes ndaj postimeve mashtruese që përdorin emrin e institucioneve për të tërhequr qytetarët drejt faqeve të rrezikshme.

Në një njoftim në rrjetet sociale, AKSK bën me dije se një postim i rremë në rrjetet sociale ka shpërndarë një njoftim në emër të Aeroportit të Tiranës për “shitje valixhesh të mbetura”, duke përfshirë një link të dyshimtë, me qëllim mbledhjen e të dhënave personale dhe bankare.

AKSK cilëson se “këto janë praktika të zakonshme mashtrimi, ku shfrytëzohen emrat e institucioneve publike apo të njohura për të krijuar besueshmëri dhe për të çuar qytetarët drejt faqeve të rrezikshme”.

“Mos klikoni në lidhje të dyshimta dhe mos ndani asnjëherë të dhënat tuaja personale apo bankare pa verifikuar burimin”, thuhet në njoftim.