Pas miratimit sot nga Komisioni i Punëve të Jashtme në Parlamentin Evropian të raportit për Shqipërinë, kryetarja e Kuvendit Elisa Spiropali u shpreh në një reagim se synimi për anëtarësim brenda dekadës në Bashkimin Evropian ka mbështetje të gjerë.

“Miratimi nga Komisioni i Punëve të Jashtme të Parlamentit Europian i raportit për Shqipërinë rikonfirmon avancimin tonë të shpejtë drejt anëtarësimit në Bashkimin Europian, si vendi pararojë mes vendeve kandidate, që ecën më vendosmërisht drejt familjes europiane, vlerëson arritjet e reformave demokratizuese dhe integruese, pavarësinë e sistemit të drejtësisë dhe luftën kundër krimit të organizuar, korrupsionit e pandëshkueshmërisë”, u shpreh Spiropali.

Kryetarja e Kuvendit theksoi se, “objektivi ynë strategjik kombëtar për çeljen e gjithë kapitujve brenda muajit qershor, përmbylljen e negociatave brenda vitit 2027 dhe anëtarësimin në BE brenda kësaj dekade ka tashmë një mbështetje të gjerë nga Parlamenti Europian, Komisioni Europian dhe po fiton mbështetjen edhe nga vendet anëtare”.

Spiropali falënderoi gjithashtu reporterin Andreas Schieder “për pasqyrimin me realizëm të arritjeve të Shqipërisë, dhe deputetët që në shumicë absolute e mbështetën”.

Burimi ATSH