Biznesi dhe konsumatorët kanë rikthyer besimin në rritjen e ekonomisë gjatë muajit majit, kontribut ka dhënë treguesi i besimit në sektorin e shërbimeve që u rrit me 2.2 %.

Sipas raportit periodik të Bankës së Shqipërisë, treguesi i ndjesisë ekonomike u rrit me 1.1 pikë në muajin maj,duke qëndruar 8,9 pikë mbi mesataren historike.

Rritja e TNE-së (Treguesi i Ndjeshmërisë Ekonomike…shënim i Redaktorit) këtë muaj reflektoi përmirësimin e besimit në sektorin e industrisë dhe të shërbimeve.
Në të kundërt, rënia e besimit në sektorin e ndërtimit dhe të tregtisë dha një kontribut negativ në treguesin e agreguar për ekonominë. Besimi konsumator mbeti i pandryshuar, në nivelin e një muaji më parë.
Treguesi i besimit të industrisë (tBi) u rrit me 8 pikë përqindje në muajin maj, duke kompensuar rënien e muajit të kaluar. Niveli i tij këtë muaj është përsëri mbi mesataren historike me rreth 7.8 pikë përqindje. Përmirësimi i TBI-së u përcaktua nga vlerësimet optimiste për kontratat porositëse të bizneseve nga eksportet. Gjithashtu, bizneset ishin më optimiste edhe për prodhimin industrial aktual. Pritjet për çmimet në të ardhmen kanë shënuar rënie të lehtë krahasuar me muajin e kaluar.
Sipas vrojtimit, treguesi i besimit në ndërtim (tBn) shënoi rënie me 3.4 pikë përqindje në muajin maj. Pavarësisht luhatjeve mujore, niveli i TBN-së qëndron ndjeshëm (13.4 pikë
përqindje) mbi mesataren historike. Rënia e TBN-së këtë muaj u përcaktua nga vlerësime më të ulëta të bizneseve për aktivitetin ndërtues aktual dhe pritje më të ulëta për porositë kontraktuese. Pritjet për çmimet u rishikuan lehtë për lart këtë muaj.
Treguesi i besimit në shërbime (tBSh) u rrit me 2.2 pikë përqindje në muajin maj. Përmirësimi i TBSH-së u përcaktua nga vlerësimet më pozitive të bizneseve për ecurinë aktuale të aktivitetit të tyre dhe për nivelin e kërkesës. Pritjet e bizneseve për çmimet në të ardhmen janë rritur këtë muaj.
Ndërsa treguesi i besimit në tregti (tBt) regjistroi rënie me 1.8 pikë përqindje
në muajin maj. Niveli i tij aktualisht qëndron rreth 4 pikë përqindje mbi mesataren historike. Në rënien e TBT-së ndikuan kryesisht vlerësimet më pesimiste për ecurinë aktuale të biznesit. Në një masë më të vogël rënëse ndikoi edhe komponenti i pritjeve për nivelin e punësimit në të ardhmen. Pritjet për çmimet në të ardhmen janë rishikuar në rritje këtë muaj.

Referuar treguesit të besimit konsumator (tBK) shihet se ai ruajti të njëjtin nivel me një muaj më parë, duke qëndruar rreth 2.4 pikë përqindje mbi mesataren historike. Për sa i përket komponentëve përbërës të treguesit TBK, vlerësimi i konsumatorëve për situatën e përgjithshme ekonomike u përmirësua në maj, duke dhënë kontributin kryesor rritës. Ndërkohë, komponentët e tjerë – situata financiare e familjeve dhe blerjet e mëdha – dhanë kontribut negativ në TBK.

Burimi ATSH