Kryeministri Edi Rama dhe ministri i Mbrojtjes, Pirro Vengu ishin sot të pranishëm në Durrës, ku edhe u nënshkrua nisja e bashkëpunimit mes shoqërisë Fincantier dhe shoqërisë shqiptare KAYO për sipërmarrjen e përbashkët në industrinë ushtarake navale.

Ministri i Mbrojtjes Pirro Vengu tha se “memorandumi i mirëkuptimit që u nënshkrua sot ndërmjet shoqërisë Fincantier dhe shoqërisë shqiptare KAYO, është një hap i rëndësishëm për jetësimin e kantierit detar të Pashalimanit”.

“Bashkëpunimi mesa KAYO dhe Fincantier do të ketë përdorim të dyfishë, ai nuk do të fokusohet vetëm në forcimin e kapaciteteve të forcës detare luftarake, por gjithashtu për mjetën tregtare civile për tregun kombëtar dhe ndërkombëtar”, tha Vengu.

Po ashtu u nënshkrua edhe Letra e Qëllimit për kalimin e anijes ushtarake patrulluese “Libra” në përdorim të Forcës Detare Shqiptare.

Vengu në fjalën e tij tha se dhurimi i anijes “Libra” është një simbol i marrëdhënieve të shkëlqyera dhe të thella që ekzistojnë ndërmjet Shqipërisë dhe Italisë.

“Ky akt thekson angazhimin e përbashkët për sigurinë dhe mbrojtjen dhe forcimin e partneritetit tonë në fushën e mbrojtjes, veçanërisht në hapësirë adriatiko-joniane. Dhurimi i anijes “Libra” do të kontribuojë në rritjen e kapaciteteve luftarake të forcës detare shqiptare, do të mundësoje përfshirjen e forcave ajrore në operacionet tona detare. Për efektivët forcës sonë detare kjo anije do të rikthejë mendësinë e operimit të anijeve me kapacitete ushtarake.

“Cinikët mund të thonë: Pse një anije e vjetër? Dhe përgjigjja jonë në këtë rast, është që nuk ka rëndësi vetëm të nisesh për një përpjekje, por rëndësi ka të ngulmosh, siç është edhe motoja e anijes “Libra””, u shpreh Vengu.

Burimi ATSH