Sinodi i Shenjtë i Kishës Ortodokse Autoqefale të Shqipërisë u mblodh sot në një seancë të jashtëzakonshme, ku shprehu dhimbjen e thellë për ndarjen nga jeta të Kryepiskopit të Tiranës, Durrësit dhe gjithë Shqipërisë, Imzot Anastasios.

Gjatë kësaj seance u morën disa vendime të rëndësishme:

Mitropoliti i Korçës, Imzot Joani, u zgjodh si Mbikëqyrës (Locum Tenens) i Fronit Kryepiskopal deri në zgjedhjen e një Kryepiskopi të ri.

Shpallja e zisë kishtare për pesë ditë, nga data 25 deri më 29 janar 2025.

Homazhet do të nisin të martën, më 28 janar, në ora 16:00, para Katedrales “Ngjallja e Krishtit” në Tiranë. Besimtarët do të kenë mundësi ta nderojnë Kryepeshkopin e ndjerë gjatë kësaj pasditeje dhe gjatë gjithë ditës së mërkurë, më 29 janar. Shërbesa e varrimit do të kryhet të enjten, më 30 janar, në ora 11:00, pas Liturgjisë Hyjnore.

Në përfundim të mbledhjes, Sinodi i Shenjtë kreu një shërbesë përshpirtjeje dhe ftoi të gjithë besimtarët të bashkohen në lutje për prehjen e shpirtit të Kryepiskopit të ndjerë.

Sinodi i Shenjtë i Kishës Ortodokse Greke njoftoi se, trupi i Kryepeshkopit Anastas do të qëndrojë për nderim publik në Katedralen e Athinës deri në mëngjesin e së hënës, 27 janar. Në ditën e diel, në nder të tij, do të mbahet një Liturgji Hyjnore në këtë katedrale.

Trupi i Kryepeshkopit pritet të transportohet përmes rrugës tokësore drejt Shqipërisë të martën, ku ceremonia e homazheve do të zhvillohet në Katedralen “Ringjallja e Krishtit” në Tiranë.

Janullatos pësoi hemorragji gastrike, dhe pas disa ditësh trajtimi në një spital privat në Tiranë, gjendja e tij shëndetësore u përkeqësua, duke e detyruar atë të transportohej më 3 janar drejt Athinës me një avion të Forcave Ajrore.

Pavarësisht përpjekjeve mjekësore dhe kujdesit intensiv që ai mori, gjendja e tij u përkeqësua përditë, për shkak të funksionimit të pamjaftueshëm të disa organeve.

Burimi ATSH