Ministrja e Turizmit dhe Mjedisit, Mirela Kumbaro zhvilloi një takim në Madrid, Spanjë me Presidentin e “Melía Hotels International”, Gabriel Escarrer Jaume në Madrid.

Kumbaro ndau në rrjetet sociale momente nga takimi me Presidentin Jaume, me të cilin bisedoi për projekte të përbashkëta.

““Melía Hotels International” është një prej grupeve më prestigjioze të investimit në hoteleri që tashmë ndodhet në Shqipëri me plot 23 projekte elitare, duke u shndërruar edhe në një prej promotorëve më të shkëlqyer të turizmit shqiptar”, tha Kumbaro.

“Avancojmë gjithashtu edhe me projekte të reja të formimit të të rinjve, siç është ngritja e shkollës së kulinarinë dhe shërbimit në hoteleri-turizëm që do të jetë një tjetër mundësi fantastike për të rinjtë tanë”, tha Kumbaro.

Ministrja Kumbaro ndodhet në Madrid, Spanjë në kuadër të pjesëmarrjes së Shqipërisë në Panairin Ndërkombëtar të Turizmit “Fitur 2025” në Madrid. Kumbaro ka zhvilluar takime me sekretarin e përgjithshëm të Organizatës Botërore të Turizmit, Zurab Pololikashvili, ministrin spanjoll të Industrisë dhe Turizmit, Jordi Hereu, si dhe sekretaren e shtetit për Turizëm të Spanjës, Rosario Sánchez Grau, ku u diskutuan marrëveshje që çojnë përpara bashkëpunimin mes dy vendeve në inovacion, digjitalizim dhe kapacitete njerëzore.