Kryeministri Edi Rama nënvizoi sot garancinë ekonomike që mundëson studimi në arsimin profesional, arsim që sot siguron punë të shpejtë dhe të mirëpaguar për të rinjtë.

Agjencia për Medie dhe Informim ndau momente nga fjala e kryeministrit Edi Rama në shkollën profesionale “Beqir Çela”, në Durrës, ku këtë vit janë shtuar 400 regjistrime të reja në pesë drejtime të ndryshme.

Gjatë aktivitetit, Rama nënvizoi se të shkosh në arsim profesional, nuk është si të shkosh në kategorinë e dytë.

“Për shumicën ky është arsimi i të nesërmes dhe arsimi që të jep punë më të shpejt dhe më të mirëpaguar sot. Edhe në arsimin profesional, po të duash ti, mund të shkosh në universitet për çdo degë që ti do, ndryshe nga ai që bën arsimin e përgjithshëm dhe shkon në universitet dhe pastaj në fund fare pretendon një gjë të madhe, por i ngelet diploma në dorë”, theksoi Rama.

“Ti që ke bërë arsimin profesional në të gjitha rastet ke zanat dhe me atë zanat, ti, jo vetëm që punon gjatë kohës që kryen studimet, por ti fiton të gjitha ato shqisat e nevojshme për të bërë edhe sipërmarrjen tënde, jo thjeshtë për të shkuar e për të punuar tek të tjerët, po të bësh sipërmarrjen tënde të vogël të shërbimit; elektroauto, hidraulik, elektricist, IT, etj etj dhe dhe pa diskutim që ky është arsimi i të nesërmes për shumicën”, shtoi ai.