Prezenca e OSBE në Tiranë do të vazhdojë mbështetjen për konsolidimin e mëtejshëm të marrëdhënieve mes Gjykatës Kushtetuese dhe asaj të Lartë, për të forcuar shtetin e së drejtës në Shqipëri.

Ky ishte dhe fokusi i tryezës së mbajtur këtë të premte në Tiranë me temë “Juridiksioni kushtetues dhe juridiksioni gjyqësor mbi zbatimin e disa standardeve të procesit të rregullt ligjor”.

OSBE mbështeti tryezën e bashkëpunimit, e dyta e këtij lloji e organizuar këtë vit.

Tryeza “Juridiksioni kushtetues dhe juridiksioni gjyqësor mbi zbatimin e disa standardeve të procesit të rregullt ligjor”, në të cilën merrnin pjesë gjyqtarët dhe këshilltarët ligjorë të të dyja gjykatave, u hap nga kryetarja e Gjykatës Kushtetuese Holta Zaçaj dhe kryetari i Gjykatës së Lartë Sokol Sadushi.

Në fjalën e tij përshëndetëse, kryetari i Prezencës së OSBE-së, ambasadori Bruce Berton, theksoi rëndësinë e thellimit dhe forcimit të marrëdhënieve si dhe të kuptimit të juridiksioneve mes dy gjykatave. Ai tha se Prezenca mbetet e gatshme të vijojë të mbështesë konsolidimin e parimeve kushtetuese, duke nxitur marrëdhënie edhe më të ngushta mes Gjykatës Kushtetuese dhe Gjykatës së Lartë dhe duke forcuar shtetin e së drejtës në Shqipëri. (ATSH)