Gjykata e Apelit Kundër Krimit të Organizuar dhe Korrupsionit, ka rrëzuar kërkesën e Safet Gjicit, ish Kryetar i Bashkisë së Kukësit, i cili kërkoi lirimin e tij nga qelia.

Mëngjesin e sotëm, Apeli i GJKKO mori në shqyrtim kërkesën e Safet Gjicit dhe të pandehurës tjetër Alma K, që kërkuan një masë më të lehtë sigurie, në vijim të hetimit ndaj tyre. Por, pasi përfunduan parashtrimet, togat e zeza vendosën lënien në fuqi të vendimit të marrë në fund të qershorit GJKKO e shkallës së parë, duke lënë bë burg Safet Gjicin dhe “arrest shtëpie” Alma K.

Ish Kryebashkiaku i Kukësit, Gjici po hetohet nga Prokuroria e Posaçme Kundër Krimit të Organizuar dhe Korrupsionit për “Shpërdorim Detyre” dhe “Korrupsion Pasiv”. Ndërsa Alma K, po hetohet mbi akuzën e “Korrupsion aktiv”

“Gjykata e Posaçme e Apelit për Korrupsionin dhe Krimin e Organizuar, me trup gjykues monokratik të përbërë nga gjyqtare Saida Dollani, sot më datë 14.07.2023, zhvilloi seancë gjyqësore për çështjen penale nr. 32 akti, datë 10.07.2023 regjistrimi, regjistruar mbi ankimin e personave nën hetim S.Gj., A.K., ndaj vendimeve nr. 73, datë 24.06.02023 dhe nr. 74, datë 26.06.2023 (mbi caktimin e masave të sigurimit personal) të Gjykatës së Posaçme të Shkallës së Parë për Korrupsionin dhe Krimin e Organizuar dhe vendosi:

– Miratimin e vendimit nr. 73, datë 24.06.2023 dhe të vendimit nr. 74, datë 26.06.2023 të Gjykatës së Posaçme të Shkallës së Parë për Korrupsionin dhe Krimin e Organizuar në lidhje me të hetuarin S.Gj.

– Mospranimin e ankimit të paraqitur nga e hetuara A.K. nëpërmjet mbrojtëses së zgjedhur ndaj vendimit nr. 74, datë 26.06.2023 të Gjykatës së Posaçme të Shkallës së Parë për Korrupsionin dhe Krimin e Organizuar”, njofton Gjykata e Apelit Kundër Krimit të Organizuar dhe Korrupsionit.

Hetimi ndaj Gjicit dhe Alma K, nisi në 16 qershor 2023, teksa arrestimi i ish kryebashkiakut të Kukësit, u realizua me 24 qershor me urdhër të SPAK.