Qeveria shqiptare miratoi sot marrëveshjen me Malin e Zi “Për njohjen e sigurimeve shoqërore”.

Ministrja e Financave dhe Ekonomisë, Delina Ibrahimaj deklaroi se marrëveshja parashikon njohjen e viteve të punës.

Nga kjo marrëveshje përfitojnë qytetarët e të dy vendeve. Nga të dhënat rezulton se janë 560 shqiptarë që jetojnë dhe punojnë në Malin e Zi dhe 35 qytetarë malazezë që punojnë dhe jetojnë në Shqipëri.

Me ratifikimin në Parlament të kësaj marrëveshjeje këta qytetarë do t’u njihen vitet e pensioneve të pleqërisë, përfitimet për sëmundje, barrëlindje, dëme të shkaktuara gjatë punës, por edhe përfitime të papunësisë.

Shtetet me të cilat Shqipëria ka marrëveshje në fushën e sigurimeve shoqërore janë Hungaria, Kanadaja, Turqia, Belgjika, Luksemburgu, Maqedonia e Veriut, Republika Çeke, Republika Federale e Gjermanisë, Austria dhe Kosova. Kësaj liste i shtohet edhe Kroacia, me hyrjen në fuqi të marrëveshjes.

Ndërkohë që janë në proces marrëveshjet në fushën e sigurimeve shoqërore me Holandën, Rumaninë, Greqinë, Francën dhe Italinë.