Drejtoria e Përgjithshme e Arkivave të Shqipërisë dhe Drejtoria e Përgjithshme e Kadastrës Shtetërore të Presidencës së Republikës së Turqisë synojnë të thellojnë bashkëpunimin për pasurimin dhe digjitalizimin e regjistrave kadastralë.

Në ditën e dytë të vizitës zyrtare në Stamboll, drejtori i përgjithshëm i Arkivave, Auron Rrokaj, u prit nga shefi i Marrëdhënieve me Jashtë i Drejtorisë së Përgjithshme të Kadastrës Shtetërore, Haki Shahin.

Gjatë takimit, në kuadër të bashkëpunimit të vijueshëm arkivor mes Shqipërisë dhe Turqisë, përfaqësuesit e të dy institucioneve shprehën angazhimin për pasurimin dhe digjitalizimin e regjistrave kadastralë, si dhe krijimin e mundësive për shkëmbimin e përvojave dhe dokumenteve me interes të ndërsjellë.

Më herët, Rrokaj ka zhvilluar takime edhe me homologun turk, Muhammet Ahmet Tokdemir, ambasadorin e Turqisë në Shqipëri, Barış Ceyhun Erciyes, si dhe konsullin e përgjithshëm të Shqipërisë në Stamboll, Armand Shandro.

Ndërkohë, me rastin e Ditës së Republikës së Turqisë, më 29 tetor, Drejtoria e Përgjithshme e Arkivave prezantoi një ekspozitë me dokumente origjinale që dëshmojnë marrëdhëniet e hershme mes dy vendeve.

Burimi ATSH