Këshilli i Ministrave ka miratuar vendimin për përcaktimin e plotë të fushës së përgjegjësisë shtetërore të Ministrisë së Administratës Publike. Sipas këtij akti, misioni kryesor i këtij dikasteri mbetet “zhvillimi i një administrate publike profesionale, të bazuar në meritë dhe të orientuar drejt rezultateve”, si dhe “përmirësimi i cilësisë dhe aksesit në shërbimet publike, forcimi i pjesëmarrjes qytetare, transparencës dhe llogaridhënies”.

Sipas vendimit, misioni i kësaj ministrie është zhvillimi i një administrate publike profesionale, të bazuar në meritë dhe të orientuar drejt rezultateve, si dhe përmirësimi i cilësisë dhe aksesit në shërbimet publike.

Ministria do të jetë përgjegjëse për hartimin dhe bashkërendimin e politikave për organizimin, funksionimin dhe modernizimin e institucioneve të administratës publike, si dhe për menaxhimin e burimeve njerëzore, përfshirë rekrutimin mbi bazën e meritës, zhvillimin e karrierës, vlerësimin e rezultateve në punë dhe formimin profesional.

Një tjetër fushë përgjegjësie lidhet me politikat e pagave, trajtimet e tjera financiare dhe përfitimet e të punësuarve në institucionet e administratës publike. Ministria do të hartojë gjithashtu rregulla dhe metodologji për vlerësimin e performancës institucionale dhe do të monitorojë zbatimin e tyre.

Vendimi parashikon edhe monitorimin e standardeve të shërbimeve publike, duke përfshirë cilësinë, afatet, aksesin, informimin dhe përvojën e qytetarëve. Po ashtu, ministria do të koordinojë politikat për thjeshtimin e procedurave administrative dhe reduktimin e barrës për qytetarët.

Në kompetencat e saj përfshihen garantimi i pjesëmarrjes së qytetarëve në procedurat administrative vendimmarrëse, rritja e përgjegjshmërisë dhe llogaridhënies së administratës shtetërore, si dhe nxitja e ndërveprimit mes institucioneve publike, individëve dhe grupeve të interesit.

Sa i përket luftës kundër korrupsionit, ministria do të drejtojë dhe bashkërendojë hartimin e politikave dhe akteve ligjore e nënligjore për parandalimin e tij, përfshirë identifikimin, vlerësimin dhe minimizimin e rreziqeve në sektorët me risk.

Sipas vendimit, ministri përgjegjës për administratën publike do të ushtrojë edhe rolin e Koordinatorit Kombëtar kundër Korrupsionit, si dhe do të jetë bashkëdrejtues i Komitetit Shumëpalësh të Partneritetit për Qeverisje të Hapur.

Ministria do t’i ushtrojë funksionet e bashkërendimit dhe monitorimit në bashkëpunim me ministritë dhe institucionet përgjegjëse, duke respektuar kompetencat e tyre, pavarësinë e institucioneve të pavarura dhe autonominë e njësive të vetëqeverisjes vendore.

Vendimi hyn në fuqi menjëherë dhe botohet në Fletoren Zyrtare.

Burimi ATSH