Kryeministri Edi Rama prezantoi sot disa risi në kuadër të paketës së re fiskale për vitin 2027.

Sipas kreut të qeverisë, masat e shpallura synojnë të lehtësojnë barrën për shtresat me të ardhura më të ulëta, të forcojnë formalizimin e ekonomisë dhe të luftojnë evazionin fiskal.

Kreu i qeverisë tha se praktika e re e pasqyrës së çmimeve do të zgjerohet dhe do të fuqizohet për të garantuar që ulja domethënëse e çmimeve të shportës të jetë e mbrojtur nga abuzuesit e mëdhenj.

Së dyti, Rama nënvizoi se “rrisim me 1% normën standarde të TVSH-së si një kompensim i ndershëm kontributesh nëpërmjet rishpërndarjes, ose e thënë ndryshe, për të gjitha mallrat jashtë shportës, të gjithë ne do të kontribuojmë që shporta për ata që e kanë më të vështirë fundin e muajit të jetë e garantuar si një shpenzim i arsyeshëm”.

Së treti, Rama bëri me dije se do të rritet norma e tatimit mbi dividendin nga 8% në 15%, teksa shtoi se normat e tatimit mbi fitimin e sipërmarrjes nuk do të rriten.

“Dëgjojeni mirë, ndryshe nga sa ju rrokasin ekranet e korruptuara dhe portalet e paguara ne i tatojmë të mëdhenjtë, pra biznesin e madh me normën më të lartë në Ballkanin Perëndimor prej 10 e më shumë vitesh. Por sot rrisim ama në normën më të lartë që ka rajoni edhe tatimin mbi dividentin e tyre, i cili duke shkuar nga 8% në 15% i ngarkon biznesmenët e mëdhenj me një taksë më të ndershme mbi fitimin e tyre në funksion përsëri të lehtësimit të atyre që kanë më pak”, tha ai.

Një tjetër risi sipas tij lidhet me tatimin mbi pagat. Sipas kryeministrit, pragu për aplikimin e tatimit mbi pagën do të rritet nga 200 mijë në 300 mijë lekë të reja, një ndryshim që pritet të prekë rreth 32 mijë tatimpagues.

“Ulim barrën tatimore. Të vjen natyrshëm buzëqeshja, sepse janë 32.000 tatimpagues që janë pjesë vitale e shtresës së mesme që e kërkojnë prej kohësh këtë lëvizje. Rritjen e pragut sipër tatimit mbi pagën nga 200.000 në 300.000 lekë të reja. Këtë lëvizje nuk na e lejonte ekonomia deri dje, sot rritja e ekonomisë na jep mundësi”, tha ai.

Së pesti, kreu i qeverisë theksoi se “vendosim një prag të ri tatimi mbi pagën 700.000 lekë të reja, ku norma e tatimit bëhet 30% në radhë të parë, si një instrument për t’i mbyllur shtegun evazionit të dividentit”.

Burimi ATSH