Aeroporti Ndërkombëtar i Tiranës mirëpriti përfaqësues të aeroporteve rajonale, organizatave të aviacionit dhe partnerëve të industrisë nga vende të ndryshme të Evropës, në ditën e parë të takimit të 40-të të Forumit të Aeroporteve Rajonale të Këshillit Ndërkombëtar të Aeroporteve për Evropën (ACI Europe).

Një prej momenteve kryesore të aktivitetit ishte prezantimi i publikimit të ri, “Aeroportet Rajonale Evropiane dhe Angazhimi me Komunitetin”, i cili trajton mënyrat se si aeroportet mund të ndërtojnë marrëdhënie të qëndrueshme dhe domethënëse me komunitetet përreth tyre.

Gjatë ditës, drejtues aeroportesh dhe ekspertë të industrisë shkëmbyen përvoja dhe diskutuan mbi prioritetet që po formësojnë zhvillimin e aviacionit rajonal në Evropë.

Si aeroport mikpritës i këtij takimi, Aeroporti Ndërkombëtar i Tiranës vlerësoi rëndësinë e dialogut, shkëmbimit të njohurive dhe bashkëpunimit ndërmjet aeroporteve evropiane.

Forumi shërben si një hapësirë për diskutimin e zhvillimeve dhe sfidave të aviacionit rajonal, si dhe për forcimin e bashkëpunimit ndërmjet aktorëve të sektorit.

Marrë nga ATSH