Kryeministri Edi Rama zhvilloi sot në Gjirokastër një takim informues me përfaqësues vendorë dhe qytetarë të qarkut, në kuadër të diskutimeve për Reformën Territoriale.

Rama tha se reforma synon një organizim më racional të funksioneve në nivel vendor, duke sjellë ndryshime në mënyrën e organizimit të njësive administrative dhe përfaqësimit të qyteteve në këshillat bashkiakë.

“Qëllimi është të përshtatet një shpërndarje më racionale e disa funksioneve që nuk i bëjnë dot bashkitë e vogla dhe që edhe vetë njësitë administrative sot nuk funksionojnë siç duhet”, u shpreh Rama.

Ai solli si shembull qytetet e qarkut Gjirokastër, duke theksuar se në rast të riorganizimit, qytete si Libohova, Memaliaj dhe Tepelena do të kenë përfaqësimin e tyre në këshillat bashkiakë.

“Në rregullimin e sotëm, çdo qytet do të drejtohet si qytet dhe do të jetë një pjesë e strukturës së bashkisë. Do të ketë përfaqësuesit e vet në këshillin bashkiak, do të ketë kuota të përcaktuara”, tha Rama.

Sipas tij, përfaqësimi në këshillat bashkiakë do të mundësojë që qytetet të kenë zërin e tyre edhe në vendimmarrjen dhe buxhetin e bashkisë.

Rama u shpreh gjithashtu dakord me shqetësimin se disa njësi administrative nuk funksionojnë siç duhet dhe nuk arrijnë të përmbushin funksionet për të cilat janë krijuar.

Diskutimet për Reformën Territoriale, sipas Kryeministrit, synojnë të adresojnë këto problematika dhe të krijojnë një organizim më funksional të qeverisjes vendore.

Burimi ATSH