Kryeministri Edi Rama publikoi sot një tabelë me përllogaritjen e përfitimeve të prapambetura të magjistratëve, në kuadër të reagimit të tij ndaj vendimit të Gjykatës Administrative për pagat e gjyqtarëve.

Sipas tabelës së publikuar nga Rama, përfitimet e akumuluara për periudhën nga 1 prilli 2023 deri më 31 korrik 2026, ose 40 muaj, kanë një kosto totale prej 12 miliardë lekësh, e barasvlershme me rreth 130.5 milionë euro, sipas kursit zyrtar 1 euro = 91.94 lekë.

Tabela përcakton se një gjyqtar i shkallës së parë do të përfitonte në total 7,514,880 lekë, ose rreth 81,737 euro, me 605 përfitues.

Për Gjykatën e Lartë, KLGJ dhe kategori të tjera, përfitimi i akumuluar është 8,015,872 lekë, rreth 87,186 euro, për 74 përfitues.

Për gjyqtarët e shkallës së dytë, shuma e përfitimit të akumuluar arrin në 7,765,376 lekë, ose rreth 84,461 euro, për 170 përfitues.

Ndërsa për gjyqtarët e GJKKO-së dhe SPAK-ut, përfitimi i akumuluar për 40 muaj është 13,176,090 lekë, rreth 143,312 euro, për 35 përfitues.

Në tabelë bëhet e ditur se përllogaritja përfshin edhe funksione të tjera, mes tyre hetues, OPGJ dhe kategori të tjera.

Rama, në reagimin e tij në platformën “X”, tha se vendimi i Gjykatës Administrative nuk lidhet vetëm me rritjen e menjëhershme të pagave me 51%, por edhe me kërkesën për pagesën e shumave të prapambetura që nga prilli i vitit 2023.

“Gjeni në tabelën bashkëngjitur sa do të merrte çdo gjykatës personalisht në dorë nesër si shumë të prapambetur, sikur ministri i Financave të shkelte ligjin dhe të shkonte pas berihajit të kësaj vendimmarrjeje ekstra-parlamentare”, shkroi Rama.

Kryeministri e cilësoi vendimmarrjen e Gjykatës Administrative si një rast ku përmes sigurimit të padisë kërkohet jo vetëm ndalimi i një akti, por kryerja e një akti.

Çështja pritet të shqyrtohet në Kuvend më datë 17 shtator.

Marrë nga ATSH