Kryeministri Edi Rama deklaroi se deri tani nuk ka simptomë të ndonjë një “flluske” në sektorin e ndërtimit.

Në një intervistë për podkastin “Flasim Shqip”, Rama foli për sektorin e ndërtimit, por iu përgjigj edhe akuzave të opozitës për para nga bota e krimit të futura në ndërtim.

“Transaksionet për shitjen e këtyre shtëpive sot, prej disa vitesh, edhe si pasojë e punës që ka bërë SPAK-u, patjetër, janë transparente”, theksoi kryeministri.

Duke folur për sigurinë në tregun e ndërtimit, Rama tha se “bankat bëjnë teste të vazhdueshme”.

“Ne i ndjekim këto dinamika edhe me agjencitë imobiliare, bëjmë kryqëzime. Banka e Shqipërisë ndjek. Nuk ka deri tani simptomë të një flluske, nuk kemi asnjë shenjë të tillë dhe edhe ajo përralla që janë 84.000 apartamente të pa shitura është një çmenduri”, shtoi ai.

Rama u ndal edhe te zhvillimi ekonomik i vendit, ndërsa shtoi se “është rritur konsumi dhe kemi rritje të përgjithshme të të ardhurave.

“Ne mbledhim më shumë të ardhura pa rritur taksën, ne kemi vite që nuk rrisim taksa. Nga vijnë këto? Një pjesë është formalizim. Po një pjesë tjetër është ekonomi dhe kjo vjen nga njerëzit që konsumojnë, nëse blihen më shumë pasuri të patundshme. Këto të gjitha tregojnë që këtu jemi në kushtet kur ekonomia është rritur realisht”, shtoi ai