Kryeministri Edi Rama njoftoi sot se synohet që “Pasqyra” të formalizohet përmes një ligji të ri, ndërsa “Shkalla e meritës” do të jetë një tjetër komponent i sistemit, i lidhur me përdorimin e teknologjisë në rekrutimin, konkurset, provimet e standardizuara dhe vlerësimin në administratën publike.

“Ne jemi në qeveri, faktikisht, që në periudhën e fundit kemi bërë shumë, kemi bërë shumë gjëra, por kemi dëgjuar pak”, u shpreh Rama, duke shtuar se BESA synon ta çojë këtë marrëdhënie në një stad të ri.

Rama bëri të ditur se këto nisma do të lidhen me “Pasqyrën”, një sistem përmes të cilit ankesat, kërkesat dhe problematikat e qytetarëve synohet të shndërrohen në gjurmë të verifikueshme dhe të ndiqen në mënyrë të strukturuar.

Sipas Ramës, qëllimi është që qytetari të mos mjaftohet vetëm me paraqitjen e një ankese, por të mund të ndjekë edhe rrugëtimin e saj dhe të identifikohet përgjegjësia institucionale për trajtimin e saj.

“Është ideja që halli nuk mund të humbasë rrugës. Ky është ndryshimi”, deklaroi Rama.

Ai tha se përdorimi i inteligjencës artificiale do të mundësojë identifikimin e personit ose institucionit përgjegjës për një kërkesë të patrajtuar, duke e lidhur këtë proces me rritjen e përgjegjshmërisë dhe llogaridhënies.

Marrë nga ATSH