Kryeministri Edi Rama mori pjesë sot në aktivitetin për prezantimin e Programit Kombëtar të Strehimit për Shqipërinë, “Rilindja 2.0”, ku theksoi se politika e re e strehimit mbështetet mbi rezultatet e arritura gjatë viteve të fundit.

Rama u shpreh se nga viti 2018 deri në vitin 2026, nëpërmjet programeve të strehimit, janë mbështetur 30 904 familje në të gjithë Shqipërinë.

“Këto programe dhe kjo politikë e re e strehimit nuk lind në boshllëk. Nga viti 2018 në vitin 2026 që jemi sot, janë 30 904 familje të mbështetura nga programet e strehimit në Shqipëri”, tha Rama.

Kryeministri kujtoi gjithashtu objektivin e shpallur një vit më parë për mbështetjen e 50 mijë familjeve deri në vitin 2030.

“Në prezantimin e programit përpara zgjedhjeve të një viti më parë, program që, siç e thashë atëherë, nuk ishte elektoral, por ishte qeverisës, kemi folur për 50 mijë familje deri në 2030, të cilat do të kenë mundësinë e një çelësi për të hapur derën e shtëpisë, me të gjitha këto forma natyrisht”, u shpreh ai.

Rama theksoi se objektivi prej 50 mijë familjesh nuk ishte një premtim i lidhur me fushatën elektorale, por pjesë e përgjegjësisë qeverisëse.

“50 mijë çelësa nuk janë një objektiv i hedhur në ajër para një fushate, që për ne nuk ishte sfidë e mirëfilltë në aspektin e fitores, por ishte një sfidë e mirëfilltë në aspektin e barrës së madhe të përgjegjësisë që kërkuam”, tha Kryeministri.

Ai nënvizoi se rezultatet e deritanishme, me mbi 30 mijë familje të mbështetura, përbëjnë bazën mbi të cilën do të vijojë politika e strehimit.

“Dhe për këdo që e ka harruar dhe mund ta kenë harruar të gjithë praktikisht se këtu memoria bëhet gjithnjë e më e shkurtër, ndërkohë që llumi që futet në të gjithë ato kanalizimet e padukshme të trurit bëhet gjithmonë e më i trashë, 50 mijë çelësa nuk janë një objektiv i hedhur në ajër para një fushate që për ne nuk ishte sfidë e mirëfilltë në aspektin e fitores, por ishte një sfidë e mirëfilltë në aspektin e barrës së madhe të përgjegjësisë që kërkuam. Sepse ndërkohë janë 30 904 familje që janë shërbyer me politikat tona të strehimit”, deklaroi Rama.

/Marrë nga ATSH