Organizatat e shoqërisë civile mund të angazhohen tashmë në identifikimin e fëmijëve dhe familjeve në nevojë për kujdes alternativ, në promovimin dhe ndërgjegjësimin për kujdesin alternativ në familje, si dhe në mbështetjen e bashkive gjatë përgatitjes dhe ofrimit të shërbimeve.

Këshilli i Ministrave ka miratuar kriteret, procedurat dhe mënyrën e përfshirjes së organizatave të shoqërisë civile në mbështetjen e ofrimit të shërbimeve të kujdesit alternativ në familje.

Vendimi i zbardhur në fletoren zyrtare, përcakton rolin që do të kenë organizatat e shoqërisë civile në këtë sistem, duke theksuar se ato do të ofrojnë mbështetje teknike dhe profesionale, pa të drejtë vendimmarrjeje.

Për t’u përfshirë në këtë sistem, organizatat e shoqërisë civile duhet të plotësojnë një sërë kriteresh ligjore, profesionale, organizative dhe financiare.

Ndër kriteret kryesore janë regjistrimi në përputhje me legjislacionin në fuqi, si dhe përvoja e dokumentuar prej të paktën pesë vitesh në fushën e mbrojtjes së fëmijës, kujdesit alternativ ose shërbimeve sociale.

Në vendim thuhet se “organizatat duhet të kenë ekip multidisiplinar, të përbërë nga punonjës socialë ose psikologë të licencuar, të zbatojnë metodologji të strukturuara të menaxhimit të rastit dhe të disponojnë kapacitete për ofrimin e vazhdueshëm të shërbimeve sipas standardeve të cilësisë”.

Vendimi përcakton edhe kërkesa për qëndrueshmërinë financiare, kontrollin e brendshëm financiar dhe transparencën, ndërsa në aspektin e integritetit kërkohet verifikimi i stafit, përfshirë kontrollin e figurës për personat që punojnë me fëmijë, si dhe garantimi i mjediseve dhe praktikave të sigurta.

Plotësimi i këtyre kritereve do të vlerësohet nga një komision i ngritur me urdhër të kryetarit të bashkisë, në bashkëpunim me strukturat përgjegjëse. Vlerësimi do të bëhet mbi bazën e dokumentacionit të paraqitur dhe, kur të jetë e nevojshme, përmes verifikimeve në terren.

Njësitë e vetëqeverisjes vendore do të kenë përgjegjësinë për identifikimin e nevojave, shpalljen e procedurave transparente të përzgjedhjes, shqyrtimin e dokumentacionit, vlerësimin e kapaciteteve të organizatave dhe lidhjen e marrëveshjeve të bashkëpunimit.

Në nivel kombëtar, Ministria e Shëndetësisë dhe Mirëqenies Sociale do të koordinojë zbatimin dhe harmonizimin e praktikave, ndërsa Shërbimi Social Shtetëror do të ofrojë mbështetje teknike e metodologjike për njësitë vendore dhe do të monitorojë cilësinë e mbështetjes së ofruar nga organizatat.

Burimi ATSH