Aplikacioni “Agritourism AL” është kthyer tashmë në një platformë informimi për agroturizmin dhe destinacionet e turizmit rural në Shqipëri, duke u mundësuar turistëve dhe vizitorëve të planifikojnë udhëtimet dhe të zbulojnë oferta të lidhura me natyrën, gastronominë dhe traditën shqiptare.

Ministri i Bujqësisë dhe Zhvillimit Rural, Andis Salla, bëri të ditur se aplikacioni mund të shkarkohet në telefon ose të aksesohet online.

“Përmes tij mund të gjenden agroturizme, kantina, kampingje, ture kulturore dhe destinacione të turizmit rural në zona të ndryshme të vendit”, tha Salla.

Agroturizmet, edhe pse kanë të përbashkët këtë emërtim, ofrojnë përvoja të ndryshme në varësi të zonës dhe rajonit ku ndodhen, kuzhinës tradicionale, arkitekturës autentike me motive të trashëguara dhe karakteristikave të tjera që i japin secilit destinacion identitetin e vet.

Agroturizëm AL është një guidë online për të gjithë ata që duan të vizitojnë fermat turistike, të shijojnë produktet lokale, gatimet tradicionale dhe eksperiencën e posaçme që të ofron fshati përmes kësaj dege të re në zhvillim të turizmit shqiptar.

Platforma përfshin gjithashtu informacione për ture dhe aktivitete agroturistike, ndërsa u jep mundësi edhe operatorëve të promovojnë aktivitetin e tyre përmes saj.
Sipas statistikave nga MBZHR, deri në fund të vitin 2025, numëroheshin mbi 200 ferma turistike dhe rrugëtime drejt staneve, verës, ullirit, agrumeve, midhjes dhe peshkut të regjistrura nga këtë platformë, që u vlejnë agrosipërmarrësve dhe vizitorëve të këtyre pikave të bukura të Shqipërisë.

Falë mbështetjes me grante dhe lehtësive fiskale, agroturizmi është një realitet i ri për zonat rurale, në ndihmë të ekonomisë lokale sot e të asaj kombëtare nesër.

Burimi ATSH