Ministrja e Arsimit, Mirela Kumbaro vlerësoi mbylljen e kapitullit 25 të negociatave për anëtarësimin e Shqipërisë në Bashkimin Europian, “Shkenca dhe Kërkimi Shkencor”, duke e cilësuar atë një tjetër dëshmi të progresit të vendit në procesin e integrimit europian.

Në një reagim në rrjetet sociale, Kumbaro u shpreh se mbyllja e këtij kapitulli konfirmon përparimin e Shqipërisë në përafrimin me prioritetet e Zonës Europiane të Kërkimit (ERA).

Kumbaro nënvizoi se mbyllja e këtij kapitulli erdhi “përmes konsolidimit të kuadrit ligjor dhe dokumenteve strategjike, rritjes së investimeve publike në kërkimin shkencor dhe infrastrukturën kërkimore, zhvillimit të ekosistemit të inovacionit, si dhe nxitjes së bashkëpunimit ndërmjet universiteteve, institucioneve kërkimore, sektorit publik dhe sipërmarrjes”.

Kumbaro theksoi se ky rezultat është fryt i përkushtimit të ekipit të ministrisë së Arsimit, duke shtuar se procesi i negociatave po avancon me ritme të qëndrueshme.

“Falë përkushtimit të jashtëzakonshëm të ekipit të ministrisë së Arsimit, këtij procesi iu dha një tjetër rezultat konkret, që pasqyron ritmin me të cilin Shqipëria po ecën drejt anëtarësimit në Bashkimin Europian”, u shpreh Kumbaro.

Burimi ATSH