Fermerët në mbarë vendin po përfitojnë nga skema e kompensimit në masën 10% të vlerës së faturave të shitjes, një mbështetje financiare që synon të nxisë formalizimin e sektorit bujqësor, të rrisë të ardhurat e fermerëve dhe të fuqizojë prodhimin vendas.

Ministri i Bujqësisë dhe Zhvillimit Rural Andis Salla, u bëri sot thirrje fermerëve që ende nuk kanë aplikuar të përfitojnë nga kjo skemë, duke kujtuar se afati për dorëzimin e aplikimeve është data 31 korrik, për faturat e shitjeve të realizuara gjatë periudhës 1 janar–30 qershor.

Në një postim në rrjetet sociale, Salla solli në vëmendje shembullin e Bashkim Kazazit nga Kavaja, i cili prej rreth 20 vitesh merret me bujqësi dhe kultivon rrush në rreth 25 dynym serra.

“Me Bashkim Kazazin nga Kavaja, i cili prej rreth 20 vitesh i është përkushtuar bujqësisë dhe sot kultivon rrush në rreth 25 dynym serra, ndërsa ka aplikuar edhe për kompensimin në masën 10% të vlerës së faturave të shitjes, ftoj të gjithë fermerët që të aplikojnë deri më 31 korrik për faturat e shitjeve të realizuara nga 1 janari deri më 30 qershor, duke përfituar nga një mbështetje konkrete që nxit formalizimin e sektorit, rritjen e të ardhurave dhe fuqizimin e prodhimit ‘Made in Albania’”, u shpreh Salla.

Vetë fermeri tregon se ka përfitur ndër vite nga skema e mbështjese si nga masa pëe subvencionimin e plasmasit në serra, për farat dhe fidanët dhe aktualisht nga skema e TVSH.

Skema e kompensimit 10% u jep mundësi fermerëve të përfitojnë rimbursim mbi vlerën e faturave të shitjes së produkteve bujqësore, duke inkurajuar njëkohësisht tregtimin e formalizuar dhe zhvillimin e qëndrueshëm të sektorit.

Marrë nga ATSH