Kryeministri Edi Rama po merr pjesë sot me ftesë të presidentit Emmanuel Macron, në ceremoninë zyrtare me rastin e Festës Kombëtare të Francës.

Rama ndau në rrjetet sociale momente nga Parada e Madhe e 14 korrikut në Champs-Élysées, Paris, ku parakaluan edhe efektivë të Forcave tona të Armatosura me flamurin kuqezi.

I shoqëruar nga bashkëshortja Linda Rama, kryeministri iu bashkua liderëve të Koalicionit të Vullnetmirëve që ndoqën paradën në Champs Elysees.

“Paradite europiane në Paris, ku Koalicioni i Vullnetmirëve u rreshtua në Champs Elysees, si pjesë e një parade mbresëlënëse të Forcave të Armatosura të Francës me rastin e 14 Korrikut”, u shpreh Rama.

Ditën e djeshme, në Paris zhvilloi punimet samiti i Koalicionit të Vullnetarëve për Ukrainën (Coalition of the Willing) në Paris, ku i ftuar nga presidenti Macron, ishte edhe kryeministri Edi Rama.

Takimi mblodhi në Paris krerë shtetesh dhe qeverish, së bashku me presidentin e Ukrainës, Volodymyr Zelenskyy, dhe sekretarin e përgjithshëm të NATO-s, Mark Rutte, për të diskutuar koordinimin e mbështetjes ndërkombëtare për Ukrainën.

Pjesëmarrja e Kryeministrit Rama në këtë samit riafirmoi angazhimin e Shqipërisë në mbështetje të Ukrainës, në përputhje me qëndrimin e palëkundur të vendit tonë në mbrojtje të së drejtës ndërkombëtare, sovranitetit dhe integritetit territorial të Ukrainës, si dhe në koordinim të ngushtë me aleatët dhe partnerët euroatlantikë.

Burimi ATSH